Во Скопје заедничка владина седница на Северна Македонија и на Албанија

– Владите на Северна Македонија и на Албанија денеска во Скопје ќе одржат меѓувладина седница на која официјални обраќања ќе имаат премиерите Димитар Ковачевски и Еди Рама.

На меѓу владината седница ќе се одржи и церемонија на потпишување на договори и меморандуми од страна на министрите на двете влади со цел продлабочување на соработката меѓу двете земји.

– Односите меѓу Северна Македонија и Албанија се на исклучително високо ниво, исто како што се на исклучително високо ниво и со другите соседни држави, изјави вчера премиерот Ковачевски по увидот на реконструираната полициска станица во Гази Баба.

Граѓаните, додаде тој, може да очекуваат средба меѓу двете влади, во исклучително позитивна атмосфера.

-Министерствата веќе имаат подготвено поголем број меморандуми и одлуки за соработка, кои не само што ќе бидат разгледани, туку и ќе бидат потпишани заедно со министрите од Албанија, нагласи Ковачевски.

Премиерот посочи дека за целиот тек на средбата за заедничката владина седница медиумите постојано ќе бидат информирани. Подоцна, како што рече, веројатно ќе следува и прес-конференција со премиерот на Албанија Еди Рама.