Утре итен состанок на Советот за безбедност на ОН поради насилството во Појасот Газа

– Советот за безбедност на ОН утре ќе одржи итен состанок зад затворени врати за да разговара за најновата ескалација на конфликтот меѓу Израел и палестинскиот Исламски џихад во Појасот Газа, соопшти палестинскиот амбасадор во ОН Ријад Мансур.

Состанокот е на иницијатива на Обединетите Арапски Емирати (ОАЕ), членка на Советот за безбедност на ОН, заедно со Кина, Франција, Ирска и Норвешка, се наведува во соопштението на директорката за стратешки комуникации на МНР од Емиратите, Афра Махаш ал-Хамели.

„Обединетите Арапски Емирати ја нагласија потребата да се врати мирот во Појасот Газа, да се намали ескалацијата и да се зачуваат цивилните животи“, рече таа, додавајќи дека Абу Даби „изразува длабока загриженост поради сегашната ескалација и повикува на максимална воздржаност за да се спречи вовлекување во нови нивоа на насилство и нестабилност“.

На утрешната средба членовите на Советот за безбедност ќе разговараат за најновите случувања и како да се „поддржат меѓународните напори за постигнување сеопфатен и праведен мир“, објавија израелските медиуми.

Одлуката за средбата е донесена неколку часа откако палестинската мисија во ОН им се обрати на членките на Советот за безбедност на ОН и ги повика, како што се наведува во соопштението на кабинетот на палестинскиот амбасадор, „да ги преземат (своите) одговорности за да ја запрат израелската агресија врз палестинскиот народ во Појасот Газа и да обезбедат меѓународна заштита за палестинскиот народ“.