Столтенберг: НАТО го следи движењето на Пригожин и припадниците на „Вагнер“

Генералниот секретар на НАТО Јенс Столтенберг изјави дека Алијансата ги следи неодамнешните движења на лидерот на групата „Вагнер“, Евгениј Пригожин и неговите припадници.

Белорускиот претседател Александар Лукашенко вчера изјави дека Пригожин ја напуштил територијата на неговата земја, каде допатува согласно договорот за прекин на вооружениот бунт од 24 јуни, и дека се вратил во Русија, поточно во Санкт Петербург.

Дипломатскиот уредник на Ал Џезира, Џејмс Бејс, побара од Столтенберг коментар токму за оваа тема- извештаите дека Пригожин се вратил во Санкт Петербург, на што генерачниот секретар на Алијансата кажа НАТО ги надгледува неодамнешните патувања на лидерот на „Вагнер“, кои ги опиша како – „помалку се движеше наоколу“.

-Тоа што можеме да го кажеме за Пригожин е дека внимателно следиме каде се движат војниците на „Вагнер“, а, исто така, и каде тој се движи, рече Столтенберг.

„Нема да навлегувам во детали, но видовме одредени подготовки за прием на големи групи војници на „Вагнер“ во Белорусија. Досега не видовме дека толку многу одат натаму“, рече тој.

-И тогаш го видовме Пригожин како малку се движи, рече Столтенберг, додавајќи дека нема да навлегува во детали за тоа што НАТО го знае.