Спасувачките екипи во Сечуан забрзано работат на терен за извлекување преживеани од под урнатините

Спасувачките екипи вложуваат големи напори да спасат луѓе по земјотресот со јачина од 6,8 степени според Рихтеровата скала што го потресе округот Лудинг во југозападната кинеска провинција Сечуан.    

Метеоролозите за денеска најавуваат врнежи од дожд во регионот, што дополнително ќе ја отежнат спасувачката операција. Најмалку 66 лица загинаа во потресот, 15 се водат за исчезнати, а 253 се повредени. Пет хоспитализирани лица се во критична состојба. Работната група формирана од Државниот совет пристигна вчера рано наутро за да ги координира спасувачките активности.

Оштетени се повеќе од 300 базни станици и 134 километри оптички кабли, а повеќе од 16 илајди лица се надвор од комуникациската мрежа. До синоќа санирани се 77 базни станици, а струја повторно е обезбедена до 22 илјади домаќинства. Покрај пожарникарите под воена команда, во спасувањето се вклучија и војниците на копнените сили на кинеската Народна армија.

Во спасувањето учествуваат повеќе од 6.650 луѓе, меѓу кои војници, инженери и работници на службите за итна медицинска помош. Беспилотните летала играат важна улога во спасувањето, обезбедувајќи мобилен комуникациски сигнал каде копнените врски се во прекин.

Преку нив се обезбедуват снимки од ситуацијата на терен што помага во координација на спасувачките екипи и придонесуваат за побрза реакција.