„Плати со поезија“ првпат во Велес

Поттикнување на поетскиот дух кај младите и возрасните и откривање нови поетски таленти е целта на глобалниот настан „Плати со поезија“, кој по повод Светскиот ден на поезијата, годинава освен во Скопје се одржа и во кафетеријата „Чао кафе“ во Велес. 

Трета година по ред Македонија е дел од глобалниот настан „Плати со поезија“ што го организира „Јулиус Мајнл“ во 36 држави и во над 1.400 кафетерии низ светот, по повод Светскиот ден на поезијата

-Со пишување на поезија денеска велешките поетски надежи имаа можност да се приклучат на манифестацијата да напишат поезија и да испијат бесплатно кафе или чај. Во Велес имаше огромен интерес на љубителите на поезијата од сите генерации, а што пријатно не изненади, истакна Љупка Андоновска од организацијата на манифестацијата.

Дел од стиховите кои денеска ги напишаа љубителите на поезијата од Велес, како и оние од Скопје, познати писатели кои се подржувачи на манифестацијата, а кои ќе ги оценат како најуспешни, како што појасни Андоновска, потоа ќе бидат отпечатени во брошурата на манифестацијата насловена „Плати со поезија“.