Новоизбраните членови на ДИК дадоа свечена изјава

Новоизбраните претседател, потпретседател и членови на Државната изборна комисија денеска дадоа свечена изјава пред претседателот на Собранието на Република Македонија, Трајко Вељаноски.

Собранието на Република Македонија вчера во рамки на 83. седница со 102 гласови „за“, без „воздржани“ и „против“ го изгласа новиот состав на Државната изборна комисија. 

За претседател на Комисијата е избран Александар Чичаковски, за потпретседател Реџеп Прекопуца, двајцата од редовите на експертите. Членови на Комисијата се Атанас Урумов, исто така од редот на експертите, Силвана Бонева и Сашо Срцев на предлог на ВМРО-ДПМНЕ, Виолета Дума и Игор Милев на предлог на СДСМ, Субхи Јакупи од ДУИ и Бедередин Ибраими на предлог на ДПА.