Нова легислатива за силувачите во Германија

Германската Влада ги одобри промените во Кривичниот закон со кои во иднина полесно ќе се носат пресуди за сексуалните престапници, јави дописникот на МИА од Берлин.

Според старите закони, со кои се гонеа случаи на силување, жртвите покрај вербален отпор мораа да докажат дека дале и физички отпор на силувачот.

Законот, кој допрва треба да биде усвоен од Парламентот, е донесен по новогодишните инциденти во Келн и други германски градови, каде стотици жени беа жртви на вербални и физички сексуални напади од страна на имигранти.

Германскиот министер за правда Хајко Маас вели дека предлог-законот е важен чекор во заштита на жртвите на сексуално насилство.

Со промените на законот за носење пресуда против силувачите нема да има потреба жртвата да докажува дека физички се спротивставила при сексуално насилство. Измените ќе овозможат полесно да се санкционираат случаи во кои жртвите биле фатени на изненадување или предходно преплашени или пак биле во врска под принуда со насилство.