Намален водостојот на реката Вардар

Намален е водостојот на реката Вардар на мерните место кај Јегуновце, Скопје и кај Демир Капија, покажаа најновите мерења на Управата за хидрометеоролошки работи.

Најголемо намалување е забележано кај Јегуновце, од вчерашните 146 на 92 сантиметри. Во Скопје кај Железниот мост вчера се измерени 111, а денеска 97 сантиметри, додека кај Демир Капија, има пад од 142 на 136 сантиметри.

УХМР бележи намалување на водостојот и на реката Лепенец кај вливот, Треска кај Македонски Брод, Пчиња кај Пелинце, Крива Река кај Крива Паланка, Брегалница кај Берово и кај Штип, Струмица кај Сушево и кај Ново Село, Црн Дрим кај Ложани, Сатеска кај Ботун, како и на Радика кај Бошков Мост.

Зголемување е евидентирано на реката Пчиња кај Катлановска Бања, од 72 на 79 сантиметри. Водостојот на Црна Река кај Новаци е зголемен од 54 на 56 сантиметри.