Конференција за безбедносни предизвици и неопходни чекори: Политичко безбедносната состојба во Северна Македонија е стабилна, но неизвесна

Неизвесна но стабилна е актуелната безбедносна состојба во Северна Македонија, оценија денеска дел од панелистите на дебатата насловена „Периодот пред нас-време на безбедносни предизвици и неопходни чекори“ во организација на Клубот на генерали, Клубот на дипломати, Балкански форум за безбедност и Здружението на ветерани и резервисти од одбраната и безбедноста.

Последните случувања во државава, според, претседателот на Балкански форум за безбедност Благоја Марковски, ја зголемуваат неизвесниста. Тој вели дека услови за политичка криза има, набројувајќи ги носењето на Законот за обвинители, аферата „Рекет“, оценката на Венцијанската комисија, прашањето за попис, најавените предвремени парламентарни избори како и условите кои ги бара Бугарија, за кои истражувањата на Евротинг покажуваат дека нашите граѓани, „традиционалниот непријател“ Грција го заменуваат со Бугарија.

-Според странските аналитичари, „внатрешно политичката криза во нашата земја ги потврдува бројните гласови кои предупредуваа дека натамошното отфрлање на земјата од страна на Брисел може да испрати катастрофален сигнал и долгорочно да ја згрози дури и стабилноста на земјата. Опозицијата која пред договорот со Грција критикуваше дека со менувањето на државното име се губи националниот идентитет, а на крајот земјата сепак може да влезе во ЕУ, со одлуката од Брисел добива ветер во грб“. Како потврда за внатрешно политичката криза веќе имаме најавени предвремени парламентарни избори, а од друга страна опозицијата, убедена дека „земјата нема перспектива за полноправно членство  во ЕУ и ќе нема уште долго време, најавува разгледување на можноста зза враќање на уставното име доколку дојде на власт, констатира Марковски.

Тој смета дека проблемите ќе се множат но и дека без Преспанскиот договор нема да можеме да бидеме полноправна членка на ЕУ, ниту сега, ниту пак во иднина. Според него, последното национално разочарување (непочнувањето на преговори со ЕУ)  не смее да стане национална трагедија.

Членот на Националниот совет за безбедност и прв министер за одбрана Трајан Гоцевски рече дека блокадата на ЕУ околу добивањето на датумот за прговори внесе немир кај нашите граѓани, но дека тоа не е фактор кој е пресуден, а може на подолга патека да влијае врз безбедносната состојба во Северна Македонија.

-Направивме многу реформи, но мораме да бидеме свасни дека имаме се уште незавршине работи, без разлика на оценката дека ние сме ги исполниле сите критериуми. Ова е опомена за нас, ние наместо да бараме вина во ЕУ или Франција, треба внатре да ја направиме нашата земја постабилна, економски попросперитетна, да биде безбедна држава и пристојно место за живеење за сите, истакна Гоцевски.

Во однос на безбедноста, Гоцевски рече дека оценката е дека и во регионот и во нашата држава, односите се стабилни. Според него, не може да се очекуваат дејствија кои ќе ја нарушат независноста и територијалниот интегритет на Северна Македонија.

На дебатата, панелистите говореа за геостратегиската и геополитичката реалност како резултат на почетокот на преговорите со ЕУ, членството на Северна Македонија во Алијансата – безбедноста и стабилноста во регионот, градење на пријателски односи со соседите…