Едукативна работилница на ФЗОМ во Кичево

Директорите на Фондот за здравствено осигурување на Македонија Сашо Стефаноски и Орхан Рамадани денеска во Кичево ја одржаа 24-тата едукативна работилница, која е дел од предвидените 32 едукативни работилници, кои ФЗО ги реализира во текот на 2015 година, на територија на Република Македонија.

- Фондот за здравствено осигурување полага исклучително внимание на директната средба со осигурениците за градење на заедничка доверба и меѓусебна почит, бидејќи целта е иста, квалитетни здравствени услуги, задоволни пациенти, истакна Стефановски.

Констатира дека токму пензионерите се квалитетен опсерватор на здравствениот систем во целост, не само во Македонија, туку насекаде во светот и искажа благодарност до Сојузот на пензионери поради нивната посветеност и квалитетни предлози од сферата на здравството и нивната конструктивна улога во изнаоѓање на поефикасни решенија кои се од корист на пациентите.

Стефановски како значен го истакна проектот на Фондот кој овозможува хроничните пациенти со едно доаѓање кај матичен лекар да подигнат рецепти за шест месечна терапија. Посочи и дека Фондот во континуитет работи да обезбеди што повеќе лекови без доплата.

Според претседателот на Сојузот на пензионери на Македонија Драги Аргировска, овие средби имаат ефект кој е од корист на осигурениците и пациентите и затоа оваа соработка ќе продолжи и во иднина.