Џафери-Пападимулис: Преспанскиот договор прозорец за целиот регион и неговата интеграција во ЕУ

Европскиот парламент демонстрира конкретна поддршка на евроинтегративните процеси на нашата земја, што за нас претставува сигнал за остварување на сите вредности за членство во Унијата, со надеж дека и во новиот состав на Европскиот парламент континуираната соработка ќе продолжи на сите нивоа како и досега, порача претседателот на Собранието Талат Џафери на попладневната средба во Скопје со потпретседателот на Европскиот парламент Димитриос Пападимулис од Република Грција.

Претседателот Џафери, соопштуваат од собраниската прес-служба, го информираше соговорникот за евроатлантските процеси, процесот на заокружување на ратификацијата на Пристапниот протокол за членство на Република Северна Македонија во НАТО и очекувањето на добивање датум за отпочнување на преговори за членство во ЕУ.

Отпочнувањето на преговорите го оцени како акт на валоризација од страна на ЕУ за нашите преземени реформи и затворањето на отворените прашања со соседите, што само по себе нема да значи и членство во ЕУ, туку отпочнување на нова фаза во евроинтегративниот процес чие завршување ќе зависи од нас самите и од динамиката на преземените реформи. Во однос на соработката со Република Грција, претседателот Џафери истакна дека очекува предложената парламентарна соработка по ратификацијата на Преспанскиот договор да продолжи и со актуелниот состав на грчкиот парламент.

Потпретседателот Пападимулис искажа огромно задоволство од повторната средба, искажувајќи ја својата лична поддршка на европските интеграции на Република Северна Македонија. Според него, Преспанскиот договор е камен-темелник кој дава добра основа за градење чекор по чекор, на европската ориентација на земјата. Истовремено, ја искажа поддршката на политички партиите во Европскиот парламент, на Европската комисија и на Европскиот совет на овој договор како прозорец за целиот регион и неговата интеграција во ЕУ.

Тој посочи дека отпочнувањето на преговорите за членство во ЕУ ќе испрати важна порака до граѓаните дека ги охрабрува да продолжат со реформите.

-Во овој момент, особено е значајно секоја земја да биде поединечно вреднувања за чекорите кои ги презема и да биде соодветно наградена, како и да се испрати порака дека и покрај излегувањето на одредени земји од Унијата, сепак таа останува отворена за прием на нови земји членки, посочил Пападимулис.