Црна Гора повторно ја затвора границата со Албанија

Црна Гора повторно ја затвора копнената граница со Албанија, поради зголемениот број на новозаразени со Ковид -19, соопшти албанското Министерство за Европа и надворешни работи.

Во соопштението стои дека овој режим започнува на полноќ в недела, 21 јуни 2020 година, и важи до следната одлука на Главниот кризен штаб во Подгорица.

-Штабот на црногорската влада одлучи да го преразгледа списокот на земји на кои ќе им се дозволи да влезат на нејзината територија, како дел од борбата против пандемијата со коронавирусот. По проценката за состојбата со опасниот вирус во Албанија, донесена е одлуката за повторно затворање на границата со нашата земја, стои во соопштението на албанското министертво.

Од оваа одлука се изземаат здравствени работници, медицински истражувачи, лица кои се занимаваат со превоз на стока и друг транспорт, дипломати, персонал на меѓународни организации, воен персонал и хуманитарни работници, специјални категории на патници во транзит и лица на кои им е потребна меѓународна заштита во Црна Гора или од други хуманитарни причини.