„Аутомобили Гроуп“ нов овластен увозник на „Јагуар и Ленд Ровер“ за Македонија

„Аутомобили Гроуп“ е нов официјален импортер и дистрибутер на автомобилските брендови „Јагуар“ и „Ленд Ровер“ за регионот на Македонија и Косово.

Генералниот директот на „Аутомобили Гроуп“ Кочо Бураку изјави дека нивното долгогодишно искуство во индустријата им дава за право да бидат сигурни во успехот на „Јагуар“ и „Ленд Ровер“ во Македонија и Косово.

- Побрза испорака до крајните потрошувачи, подобра техничка поддршка, како и развивање на продажбата во овој сегмент автомобили за целосно задоволство на клиентите, рече Бураку.

Генералниот директор на „Wallis Automotive Europe“ Ендру Прест, кои се официјален застапник на возилата „Јагуар“ и „Ленд Ровер“ за Адриатик регионот, изрази задоволство за договорената соработка со компанијата „Аутомобили Гроуп“.

- Британскиот производител на „Јагуар“ и „Ленд Ровер“ ја одбра токму нашата компанија да ги претставува овие брендови во регионот и тоа во возбудлив период кога и двете марки бележат фантастичен пораст. „Јагуар“ годинава забележа раст од 82 проценти и во моментов претставува најбрзорастечка автомобилска марка во Европа. До крајот на оваа финансиска година, „Јагуар“ и „Ленд Ровер“ ќе комерцијализираат и три нови модели, рече Прест.

„Аутомобили Гроуп“ подготвува нов објект на 680 метри квадратни што ќе биде составен од изложбен салон, продажба, канцеларии, простор за аксесоари, предавање на возила и прием на возила на сервис. Официјалното отворање е најавено за април 2017 година.