Македонија
23. February 2016 - 16:23

Грција со протестна нота до Австрија за утрешниот состанок за бегалците

Грција и врачи протестна нота на Австрија поради средбата на министрите за надворешни и за внатрешни работи на сите земји од Балканската рута, како и Албанија, Бугарија и Црна Гора, свикана утре во  Виена, на која Атина не е поканета.

Иницијативата на Австрија се оценува како непријателска кон Грција бидејќи одлуките што ќе се донесат за справување со бегалската криза директно ја засегаат Грција и нејзината граница. Премиерот Ципрас свика итен состанок со надлежните министри, поради стравот дека Грција ќе стане голем мигрантски камп.

Истовремено, министерот за миграциска политика Јоанис Музалас им се закани на соседните држави, кои не примаат бегалци.

,,Со некои од тие држави ќе се видиме во ЕУ, кога се распределуваат пари за земјоделство или за образование и кога ќе треба да ги поддржиме за членство‘‘, рекол Музалас

Весникот То Вима, пак под насловот ,,Понуда од Виена за Скопје - Олеснување за името во замена за соработка околу бегалците‘‘ пишува дека Австрија презема водечка улога на Западниот Балкан и е подготвена да се ангажира за решавање на спорот за името на Македонија, за поблиска билатерална соработка околу контролата на бегалскиот бран.

Повикувајќи се на веродостојни извори, То Вима тврди дека понудата е дадена за време на посетата на Себастијан Курц на Македонија во рамките на западно-балканската турнеја. Токму на таа средба е потпишан план за заедничка акција, со кој Австрија нуди безрезерва помош, не само за Македонија туку и во решавање на сите други отворени прашања на земјите од Балканскиот коридор.

Последните чекори со рестриктивно пропуштање бегалци и враќање на Авганистанците од Австрија, па се до грчката граница, според весникот зборува за вистинитоста на едностраните чекори на Виена, наспроти одлуките на Советот на Унијата, на кои им претходеше и Загрепскиот протокол со кој единствена регистрација на бегалците ќе се врши на македонско-грчката граница и транспорт без дополнителни процедури до некоја од земјите членки на Унијата.

На обвинувањата Музалас дека со делумното затворање на границата Македонија го прекршила договорот од Брисел, од македонското МНР одговорија дека во однос на менаџирање на мигрантско-бегалската криза Македонија постапува согласно одлуките на земјите од балканската рута и ЕУ практиките.