Златен медал на форумот Кран Монтана за сопругата на македонскиот претседател, Маја Иванова

Сопругата на претседателот на Република Македонија, Маја Иванова, е наградена со Златен медал на форумот Кран Монтана, за нејзините активности, проекти и иницијативи од хуманитарен карактер, што ќе и биде врачен денеска на свечена церемонија во рамки на 28. Годишна сесија на форумот Кран Монтана, во Барселона.

Златен медал на форумот Кран Монтана се доделува на етаблирани имиња од меѓународната јавност како признание за постигнувања во насока на похуман свет, соопшти кабинетот на претседателот на Република Македонија.

Сопругата на македонскиот претседател е вклучена во бројни активности што имаат социјален, образовен, здравствен предзнак, а пред се хуманитарен каракатер и најмногу се посветени на децата, на нивното здравје и на нивните права, здравата исхрана и навики.

Под покровителство на Иванова во Скопје беше отворен Центар за сензорна терапија на деца со аутизам, а ја предводеше и националната кампања за отворање на првиот Ургентен центар на Детската клиника, прв од таков вид во Република Македонија и регионот.

Иванова е покровител на повеќе проекти и иницијативи кои се однесуваат на жените, нивните права и женското здравје, меѓу кои се розевите кампањи, посветени на борбата против ракот на дојка. 

Сопругата на претседателот Иванов поддржува бројни општествено-корисни иницијативи и проекти во чиј фокус се ранливите категории.