Земјоделците од Кумановско да аплицираат за субвенции за нови лозови и овошни насади и за педигриран добиток

Подрачната единица на Агенцијата за развој и поттикнување на земјоделството Куманово ги информира земјоделците од регионот дека тече повикот за прибирање барања за користење средства за поврат на инвестиција за нови лозови и овошни насади и за набавен педигриран добиток од први октомври до 31 декември.

- Рокот ќе трае до 31 јуни годинава и ги повикуваме овие земјоделци кои инвестирале да аплицираат за поврат на средствата, изјави в.д. раководителот на подрачната единица Џабир Рамадани.

Сточарите треба да набават педигрирани, крави, овци, кози, свињи и можат да добијат 50 проценти поврат на средствата од инвестицијата.

- Имаме сознанија дека голем број земјоделци од Кумановско тој период подигнаа овошни насади. И како и претходните години и минатата беше тренд да се подигаат лешникови насади, истакна Рамадани.

Извесен период во Кумановско голем број земјоделци садат ореви и лешник, иако во одредени региони во овој дел од североистокот се уште се одгледува на поголеми површини кајсија, праска и слива.

Овоштарите веќе се информирале дека тече повикот и побарале помош за апликацијата од стручните лица од Подрачната единица.

Лани, само за нови овошни и лозови насади аплицирале 25 земјоделци за исплата на средства. 

Според праксата од претходните години се очекува уште еден повик за инвестициите што се реализирале од јануари до април годинава.