Земјоделците бараат долгорочна стратегија за поголемо производство и стабилни цени

Нова стратегија за поголемо производство во градинарството и модел по теркот на тутунот, предлагаат претставниците на земјоделските здруженија. За да се спречи трендот на напуштање на нивите неопходни се реформи кои ќе придонесат за посигурен пласман и стабилни цени, вели Ристо Велков, претседател на сојузот на синдикати на земјоделски здруженија.

Според него, за да се спречи напуштањето на земјоделските површини, потребна е планска организација на производството  што ќе го намали ризикот од неуспешни сезони и ќе обезбеди поголема економска стабилност за земјоделците.

Освен климатските промени, Велков вели  дека еден од клучните проблеми со кои се соочува македонското земјоделие е недостатокот од работна рака. Смета дека е неопходна посебна стратегија која ќе се фокусира на младите и ќе ги мотивира да се вратат на земјоделството.

Недостатокот на редовни и ефективни контакти со земјоделците, посебно пред почетокот на сезоната сериозно го отежнува спроведувањето на стратегиите и реформите потребни за одржлив развој во овој сектор. За земјоделците од особено значење ќе биде  и сериозна база на податоци која ќе обезбеди точни информации за состојбата на земјоделските површини.