Завршија 11. „Хераклејски поетски свечености“

Со поетската вечер во Домот на културата „Драги Тозија“ во Ресен заврши единаесеттото издание на манифестацијата „Хераклејски поетски свечености“, на која годинешен лауреат е академикот Богомил Ѓузел. 

Двочасовниот перформанс беше збогатен со учеството и на поетите Лилјана Дирјан, Љубомир Груевски, Тоде Илиевски, а беа прочитани и стихови од десетина поети од Ресен, вклучувајќи ги и оние на градоначалникот Ѓоко Стрезовски.

Промовирана беше и двојазичната книга „Жарје и ѕвезди (Embers and stars)“ со поезијата на трагично загинатата битолска поетеса Катерина Наковска. Настапи и виолинистката Елена Марковска.

На 25 август центарот на Преспа ќе биде домаќин на уште една манифестација, која ќе биде дел од „Струшките вечери на поезијата“.