ЕУ воспостави нов механизам за ограничување на цената на руската нафта

ЕУ од денеска почнува со примена на новиот автоматски и динамичен механизам за приспособување на цената на руската нафта, соопшти Европската комисија.

– Новото ограничување на цената на руската нафта е 44,10 долари за барел со важност од 1 февруари. Почнувајќи од 15 јануари, старите договори склучени според претходната ограничена цена може да се применуваат 90 дена – се наведува соопштението.

Комисијата посочува дека во согласност со 18-тиот пакет-санкции кон Русија максималната цена на руската нафтата е намалена од 60 на 47,60 долари, при што е најавен и новиот автоматски и динамичен механизам за утврдување на идните ограничување на цената на енергентот.

– Новиот механизам гарантира дека ограничувањето е секогаш 15 отсто пониско од просечната пазарна цена на уралската нафта во претходниот референтен период од 22 недели – се додава во соопштението.

Според ЕК, ограничувањето на руските приходи од енергентите постојано било и ќе остане врвен приоритет за ЕУ, со цел ослабување на способноста на Москва да ја води својата илегална воена агресија во Украина.

– Ограничувањето на цените ќе биде предмет на редовна ревизија на секои шест месеци од страна на Комисијата иако вонредни ревизии се можни кога тоа е соодветно оправдано со развојот на настаните на пазарите на нафта или други непредвидени околности. Комисијата е во редовен контакт со земјите членки на ЕУ, како и со меѓународните партнери, за да обезбеди тесна координација на мерките – нагласи ЕК.

Г7 во 2022 година ја создаде коалицијата за ограничување на цените на нафтата и воспостави механизам за ограничување на цените на руската нафта и нафтените деривати што се транспортираат по море.

Врз основа на ова на компании од ЕУ им е дозволено да обезбедуваат поморски транспорт и други услуги за руската нафта и нафтените деривати, само ако тие се продаваат на ниво или под соодветните ценовни ограничувања.

– Овој механизам е специјално дизајниран да изврши дополнителен притисок врз приходите од нафта на Русија, а воедно да ги одржува глобалните енергетски пазари стабилни преку континуирано снабдување – додава Комисијата.

МИА