Заврши заложничката криза со египетскиот авион

Лицето, кое утрово киднапираше авион на египетската авиокомпанија „Иџиптер“, и се предаде на кипарската полиција.

Како што јави кипарската државна телевизија, киднаперот со кренати раце излегол од авионот и им се предал на полицајците распоредени околу леталото.

Според телевизијата, претходно од авионот излегле седум лица, за кои се претпоставува дека се преостанатите киднапирани патници и членови на екипажот на леталото.

По објавувањето на веста за предавањето на киднаперот, Министерството за надворешни работи на Кипар на својот официјален налог на Твитер објави дека заложничката криза „завршила“.

Египетскиот авион „Ербасот А320“, кој сообраќаше на релација Александрија-Каиро, беше киднапиран изутрината, по што киднаперот го принуди пилотот да слета на аеродромот во кипарскиот град Ларнака. Меѓу патниците во авионот, покрај Египќани, имаше и Израелци, Британци, Холанѓани и Американци.