Започна одбележувањето на хоризонталната сигнализација во Куманово

ЈП „Водовод“ деновиве започна со одбележување на хоризонталната сигнализација на подрачјето на градот. За оваа намена општина Куманово одвои 2,5 милиони денари. Одбележувањето на хоризонталната сигнализација за прв пат го работи јавно претпријатие, за разлика од претходните години кога одбележувањето го спроведуваа приватни компании.

- По комплетно завршување на техничката документација, добивање дозвола од Бирото за јавни набавки, обезбедување средства и реурси за започнување на оваа работа, од вчера започнавме со одбележување на „Октомвриска револуција“ и „Ленинова“. Планот за работа го добиваме од одговорните од општина Куманово, изјави директорот на претпријатието, Горан Стојковски.

Приоритет при одбележувањето, нагласи Стојковски ќе биде даден на улиците каде се лоцирани, градинки, училишта и здравствени установи. Со одбележувањето на хоризонталната сигнализација ќе се настојува целосно да биде покриено централното градско подрачје и приградските населби на општина Куманово. Согласно, планот, одбележувањето ќе се спроведува два пати годишно.

Еден од проблемите со кои се соочуваа граѓаните на Куманово изминативе години е непостоењето на хоризонтална сигнализација, затоа кумановци постојано преку медиумите апелираа до локалната власт да преземе мерки за одбележување на пешачките премини, со цел зголемување на безбедноста во сообраќајот.