Во Кавадарци одбележани 152 години од раѓањето на Гоце Делчев

Во Кавадарци денеска беа одбележани 152 години од раѓањето на Гоце Делчев. Бројни делегации положија цвеќе пред бистата во дворот на основното општинско училиште што го носи неговото име, а ученици испеаја песна во чест на револуционерот.  

- На 4 мај 1903 година, во нерамна борба со турската војска и полиција загина апостолот на македонското револуционерно народноослободително движење. Еден од најзначајните личности од поновата историја на македонскиот народ. Гоце беше роден во Кукуш на 4 февруари 1872 година. По професија бил учител. Делчев е значаен и за развојот на револуционерното движење во Тиквешијата, на два пати престојува во овој крај. Во септември 1901 година, значително ја консолидира работата на револуционерната организација во целиот Тиквешки револуционерен реон и по втор пат доаѓа во октомври 1902 година. Гоце Делчев бил човек кој велел -   ,,Мојата мајка е земјата македонска. Род и роднина ми е зговорна дружина. Жената ми е пушката малихерка, а децата ми се дробните фишеци", потсетија од Музеј галеријата во Кавадарци.