Во Кавадарци изложба на фотографии на Жереми Бишолц од Франција

„Скопје низ објективот на еден млад француски фотограф” е насловена изложбата на фотографии на Жереми Бишолц од Франција, која денеска беше отворена во музеј галеријата во Кавадарци.

Посетителите имаат можност да погледнат 32 уметнички фотографии кои го отсликуваат главниот град на Македонија.

Директорот на кавадаречкиот музеј, Петре Камчевски нагласи дека со Францускиот институт во Скопје имаат добра и богата соработка. Како плод на таа соработка, рече, е и оваа изложба.

- Како резултат на тоа во изминатиот период реализиравме повеќе од десетина изложби меѓу кои за 200 години од Француската буржоаска револуција, за Лувр, Оноре Де Балзак и други, изјави Камчевски.

Изложбата ја отвори Тони Коцев, фотограф од Кавадарци, кој се занимава со уметничка фотографија.

- Прошетката низ скопските улици и маала Бушолц ја доживува како листање на историска книга и веднаш ја забележува архитектурната и урбаната различност на двете страни на Вардар. Од едната страна на Вардар е една приказна, додека од другата страна е сосема друга приказна, нагласи меѓу другото Коцев.