УМС од Австралија: Македонија е една и единствена

Унијата на млади сили на ВМРО-ДПМНЕ од Австралија и повеќе македонски организации, асоцијации и поединци од Мелбурн и од Австралија преку пишано соопштение до медиумите порачуваат дека ги поддржуваат мирните маршеви во повеќе градови во Македонија за зачувување на унитарноста на државата.

- Одовде од Австралија, силно ги поддржуваме мирните, достоинствени и масовни протестни маршеви, кои со денови, континуирано се одржуваат во многу градови во Република Македонија и на кои, десетици илјади правдољубив народ, со денови го изразува големиот гнев, револт и загајленост за состојбата во која е втурната наша Македонија. Даваме огромна поддршка на цврстата решеност и неотстапност во битката да не се дозволи никој да ја дели и редефинира унитарна Македонија, се вели во соопштението од УМС на ВМРО-ДПМНЕ од Австралија.

Порачуваме, се додава,  по никоја цена не смее да се дозволи промена на името, обезличување и исчезнување на македонскиот народ, воведување двојазичност на целата територија без никаква основа и причина, кантонизација и погром на татковината.

- Македонија постои со милениуми, а ќе постои и во сите идни векови. Изразуваме поддршка на државничкиот потег на претседателот Ѓорѓе Иванов, кој и покрај огромниот притисок што се врши, остана и да остане на дадената реч. Да не дозволи мандат за идна влада да се доделува и крои на основа на некакви платформи пишувани во туѓи држави. Ги охрабруваме нашите браќа и сестри во татковината, истрајно и храбро да го поминат и ова премреже, ова тешко време, и да се добие и оваа битка за опстанок и за утрешна силна и просперитетна Македонија. Бидејќи, македонскиот народ нема друга татковина. Наш заеднички дом е оваа единствена, суверена, самостојна, горда и храбра наша Република Македонија, се потенцира во соопштението од УМС на ВМРО-ДПМНЕ од Австралија.