Сообраќајот прекинат кај Мокрински Извори, по една коловозна лента кај Миладиновци поради одрон

Поради свлечиште и голем одрон, сообраќајот на 10 километри пред Миладиновци е пренасочен само на една коловозна лента, во должина од 150 метри, соопшти вечерва АМСМ.

Автомотосојузот информира дека на самото место на одронот, на патниот правец А2, Свети Николе – Миладиновци, е поставена соодветна сообраќајна сигнализација и препорачува учесниците во сообраќајот да возат внимателно.

АМСМ информира и дека поради нанос на коловозот и поплава е прекинат сообраќајот на патниот правец Р1402 Струмица – Мокрино – Смолари кај Мокрински Извори и дека екипите на ЈП „Македонијапат“ работат на расчистување на коловозот и нормализирање на сообраќајот.

На државните патишта сообраќајот се одвива по претежно суви коловози. Интензитетот на сообраќај на патните правци надвор од градските средини е умерен. На граничните премини, од македонска страна, нема подолги задржувања за влез и излез од државата.