Штипската библиотека ја возобновува француската читална

По повеќе од 15 години во Националната установа универзитетска библиотека „Гоце Делчев“-Штип повторно ќе се учи француски јазик.

Директорката на НУУБ „Гоце Делчев“-Штип, Милена Ристова-Михајловска изјави дека во рамките на Библиотеката ќе се возобнови француската читална.

- Оваа година одобрен ни е проект од областа на Европските интеграции, така што францускиот јазик ќе се изучува и во рамките на библиотеката и во рамките на нашите проектни активности, рече Ристова-Михајловска.

Таа додава дека годинава работата на штипската Библиотека ќе се промовира и на Светската конференција на библиотекари.

- Штипската библиотека со свој претставник ќе учествува на Светската конференција на библиотекарски асоцијации, тоа е ИФЛА во Полска. На оваа конференција ќе учсетвуваа и библиотеките од Скопје, Битола и Штип, реќе Ристова-Михајловска.

Забележува дека меѓу значајните проекти кои треба да ги реализира НУУБ „Гоце Делчев“-Штип е и ревалоризацијата, афирмацијата и каталогизацијата на трите значајни збирки „Ретки книги“, „Старопечатени книги“ и „Отомански ракописи“, а со кои на библиотеката ќе ги отворат вратите и кон Турција. Овие збирки, ќе бидат презентирани и на меѓународна изложба во Истанбул.