Штип ќе гради трета платформа над коритото на река Отиња

Општина Штип ќе гради платформа за паркинг места над реката Отиња, меѓу Здравствениот дом и Народен театар-Штип. Градоначалникот на Општина Штип, Благој Бочварски за МИА вели дека очекува половина од средствата односно девет милиони денари да ги добијат преку Програмата за рамномерен регионален развој од Бирото за регионален развој и Министерството за локална самоуправа.

– Станува збор за проект кој ќе чини околу 18 милиони денари, половина од средствата ги очекуваме од оваа прогарама, а останата половина ги обезбедуваме од буџетот на Општина Штип. Платформата ќе има 40 паркинг места, со што ќе се растерети сообраќајот кон регионалната Клиничка болница, но и кон останатите институции, кои имаат регионален карактер, вели Бочварски.

Ова е трета платформа над коритото на реката Отиња, која ќе го решава проблемот со паркирање во централното градско подрачје. Досега вакви платформи се изградени кај училиштето „Ванчо Прќе“ и кај Стопанска банка.