Брвеница ќе избира градоначалник во втор круг: Радичевски пред Јахиј во првиот

Во општина Брвеница ќе се одржи втор круг од предвремените локални избори за градоначалник, откако ниту еден од кандидатите не успеа да обезбеди мнозинство од гласовите.

Според резултатите објавени од Државната изборна комисија (ДИК), во вториот круг ќе се соочат Стојанчо Радичевски од ВМРО-ДПМНЕ и Аркин Јахиј од Националната алијанса за интеграција (НАИ), коалицијата предводена од ДУИ.

Радичевски освои најмногу гласови, односно 2.943 или 38,9 проценти, додека Јахиј доби поддршка од 2.152 избирачи или 28,4 проценти.

На третото место се најде Јакуп Хусеини од ВЛЕН со 1.528 гласа или 20,2 проценти, а четвртопласиран е кандидатот на коалицијата предводена од СДСМ, Јовица Радески, со 706 гласа или 9,3 проценти. Независните кандидати Душан Богдановски и Арифе Идризи освоија значително помал број гласови.