Садење дрво и читање поезија во чест на Атвуд

 Во чест на добитникот на „Златниот венец“ на 55. Струшки вечери на поезијата канадската романсиерка, поетеса, книжевна критичарка и активистка Маргарет Атвуд денеска во паркот на Поезијата ќе биде засадено дрво.

Неизоставен дел е и читањето поезија во чест на лауреатот, а вечер во црквата „Света Софија“ во Охрид ќе се одржи поетски портрет посветен на Атвуд.

На фестивалската програма се и „Ноќите без интерпункција“, односно поетски читања на отворена сцена во близина на излезот на рката Црн Дрим.

Атвуд е 51. добитник на „Златен венец“, а признанието ќе и биде врачено утре на меѓународниот поетски митинг „Мостови“ што традиционално секоја година се одржува на Мостот на поезијата. На оваа манифестација ќе бидат врачени и наградите „Браќа Миладиновци“ за 2016 година за најдобра поетска книга на македонски јазик објавена меѓу две фестивалски изданија на Иван Џепароски за книгата „Светлината на Света Гора“ и „Мостови на Струга“ на Руна Светликова што ја доделуваат СВП и за најдобра дебитантска книга.

Највисокото признание на фестивалот Струшки вечери на поезијата се состои од филигрански изработен лавров венец.