Реал ќе го продолжи договорот со голманот Лунин

Шпанскиот фудбалски првак Реал Мадрид се договори со голманот Андреј Лунин за продолжување на соработката.

Како што пренесоа денеска шпанските медиуми, ваквиот расплет е неочекуван, бидејќи украинскиот голман одби да потпише нов договор во март.
Весникот Марка објави дека Лунин ќе потпише договор до лето 2028 година.

Претходно се шпекулираше дека Лунин сака да го напушти клубот како слободен играч кога ќе му истече договорот следното лето, откако стана резервен голман на Реал по закрепнувањето на Тибо Куртоа.

Во 2018 година, Лунин се пресели од украинска Зорја во Реал, кога потпиша шестгодишен договор. Во 2019 година тој потпиша нов договор до летото 2025 година, иако клубот официјално не го објави.