Продолжува проектот „Отворени денови на ФЗОМ“

Проектот „Отворени денови на ФЗОМ“ ќе продолжи да се реализира до крајот на летово поради големиот интерес на граѓаните.

Сите заинтересирани осигуреници летово секој четврток во период од 10 до 15 часот во сите 30 подрачни служби на ФЗОМ ќе имаат можност да се информираат за начините на остварување на правата од здравствено осигурување и новините за остварување право на породилно отсуство, соопшти ФЗОМ.

Граѓаните од стручните лица во подрачните служби ќе продолжат да добиваат прецизни информации за поедноставената процедурата за пререгистрација на невработените лица, за остварување на правото на БПО, за ортопедските помагала, рефундирање на здравствените услуги и лекови, како и за тоа дали се наплаќаат лекарските потврди за во градинка, училиште.

Од ФЗОМ посочија дека граѓаните го изразиле своето задоволство од поголемата ефикасност на службите на Фондот, побрзото решавање на предметите за рефундации и на пократките рокови за сервисирање на надоместоците за породилно отсуство и за боледување, како и можноста многу од услугите да се добиваат електронски.

Досега околу 50.000 осигуреници покажале интерес да дојдат во подрачните служби и да поставуваат прашања од надлежност на работењето на Фоондот. Целта е во континуитет да се зголемува нивото на информираност на осигурениците со што тие ќе можат активно да ги остваруваат сите права од здравственото осгурување.