Преглед на вестите од светот

Европските лидери утре во Париз ќе одржат итен самит за војната во Украина. Домаќин ќе биде Францускиот претседател Емануел Макрон. На состанокот ќе бидат вклучени Франција, Велика Британија, Германија, Полска, Италија, Шпанија и Данска, кои ќе ги претставуваат балтичките и скандинавските земји.

Ова следи откако пратеникот на Доналд Трамп за Украина рече дека Европа нема да има место на масата за мировните преговори. Келог на глобалната безбедносна конференција во Минхен рече дека САД ќе дејствуваат како посредник во разговорите, со Украина и Русија како двајца протагонисти.

„Нашата филозофија не е да ја продолжиме оваа војна до смрт на секој последен Украинец. Намерата е да се запре масакрот, да се запре војната“ – кажа Кит Келог, специјален претставник на САД за Украина и Русија.

Трамп ги шокираше светските лидери со тоа што му се јави на рускиот претседател Владимир Путин без претходни консултации со никој и прогласи итен почеток на мировните преговори.

„Европа треба да биде дел од овој процес. Украина треба да биде дел од овој процес. Ако не, овој тип на прекин на огнот нема да биде веродостоен“ - изјави Криструн Фростадотир, премиерка на Исланд.

Портпаролот на Кремљ, Дмитриј Песков, го оцени разговорот меѓу Трамп и Путин како конструктивен и пријателски.

„Ова е моќен сигнал дека сега ќе се обидеме да го решиме проблемот преку дијалог, а сега ќе зборуваме за мир, а не за војна. На крајот на краиштата, што беше со претходната администрација? Нема дијалог. Војната до крај“ - изјави Дмитриј Песков, портпарол на Кремљ.

Руско-украинската војна започна на 24 февруари 2022 година.

Страшен напад се случи синоќа во австрискиот град Филах кога сириски државјанин со нож усмрти 14-годишно дете, а повреди уште четворица. Набрзо бил уапсен, а австриски Билд пишува дека имал дозвола за престој во Австрија. Нападот се случил во самиот центар на градот кога 23-годишниот маж ненадејно почнал да напаѓа минувачи со нож пред кафуле. Напаѓачот бил спречен од друг Сириец, доставувач на храна.

„Ова е исламистички напад со врски со Исламска држава од напаѓач кој, според статусот на истрагите, очигледно бил радикализиран на интернет“ – изјави Герхард Карнер, министер за внатрешни работи на Австрија.

Сириецот имал дозвола за престој во Австрија.

Најмалку 18 лица загинаа, а 10 се повредени во стампедо на железничка станица во Њу Делхи. Инцидентот се случил синоќа на два перона додека илјадници патници брзале да се качат во воз за градот Прајаграј, кој е домаќин на фестивалот Маха Кумб.

„Два воза доцнеа и зголемувањето на бројот на патници доведе до ситуација во која многу луѓе се собраа на мал простор. Некои луѓе беа повредени во тоа“ – изјави Кпс Малхотра, заменик полициски комесар.

Индискиот премиер изрази сочувство.