Пет лица се уапсени во Сиднеј поради убиството на полицаец

Пет лица се уапсени денеска во полициски акции во четири населени места во западниот дел на Сиднеј, поради наводна поврзаност со терористичкиот напад извршен минатата недела од 15-годишно момче врз полициска станица.

Околу 200 полицајци учествувале во операциите изутринава, при што се уапсени едно 16-годишно момче и четири момчиња на возраст од 18 до 22 години. Тие се притворени и сослушани во врска со нападот, во кој беше убиен 58-годишен полицаец.

Петнаесетгодишниот напаѓач Фархад Џабал беше убиен во престрелката со полицијата. Се истражуваат мотивите на Џабал да го изврши нападот, а полицијата соопшти дека убиството било политички мотивирано и е поврзано со тероризам.