Општина Росоман ќе гради тротоари крај магистралниот пат Градско Прилеп

Општина Росоман обезбеди пари за изградба на тротоари крај магистралниот пат Градско-Прилеп во делот што поминува на нејзина територија, информира денеска портпаролот на општината, Ѓорѓи Крстевски.

Во најскоро време, информира Крстевски, ќе се градат тротоари на улиците „Илинденска” и „Маршал Тито”, како и на крак од улицата „Пере Тошев”.  Проектот  се реализира преку Вардарскиот плански регион, со финансии од 6.351.183 денари обезбедени преку Министерството за транспорт и врски и Бирото за регионален развој.

- Заедно со изградбата на атмосферската канализација во тој дел за што општината ќе издвои милион и 700 илјади денари, ќе се докомплетира еден поголем проект од големо значење за росоманчани, рече Крстевски.