Објавена „Теоријата на книжевност во (интер)акција“ од Марија Ѓорѓиева Димова

Друштвото за издавачка дејност „Македоника литера“ од Скопје ја објави студијата „Теоријата на книжевност во (интер)акција“ од Марија Ѓорѓиева Димова.

Книгата содржи три дела: „Теориски модели“, „Толкувачки модели“ и „Теориски категории и концепции“.

Во книгата авторката актуализира неколку клучни книжевнотеоретски и херменевтички теми и категории, елаборирани и во теоретски и во интерпретативен контекст. Авторката ги разгледува интертекстуалноста, метафикцијата, авторот, читателот, влијанието, биографската метафикција, иронијата, интерпретацијата...

- Целта на студијата е да ја демонстрира нужната комплементарност и интерактивност меѓу книжевните теории и книжевната практика, како и да ја потврди функционалноста на книжевните теории во однос на толкувањето и на разбирањето на книжевните текстови, информира Друштвото за издавачка дејност „Македоника литера“ од Скопје.