Американски конгресмен поднесе предлог-закон Гренланд да стане 51-ва сојузна држава на САД

Републиканскиот конгресмен од Флорида, Ренди Фајн, претстави предлог-закон под наслов „Закон за анексија и државност на Гренланд“, со кој оваа територија би станала 51-ва сојузна држава на САД. Предлогот доаѓа по најавите на претседателот Трамп за преземање на оваа данска територија.

„Гренланд не е далечна испостава што можеме да ја игнорираме – тој е од витално значење за националната безбедност. Америка не може да ја остави иднината на арктичките патишта во рацете на режими кои ги презираат нашите вредности“, изјави Фајн.

Портпаролката на Белата куќа, Керолајн Ливит, потврди дека иако не постои конкретен временски рок, купувањето на островот е приоритет за Трамп за да се спречи евентуално кинеско или руско влијание врз територијата.

Од друга страна, демократскиот сенатор Крис Марфи предупреди дека секој обид за присилно преземање на Гренланд би го означил „крајот на НАТО сојузот“. Минатата година, републиканците во Конгресот веќе побараа поддршка за отворање разговори со Кралството Данска за купување на Гренланд.