Велигденов: Со години обезбедуваме плата преку позајмици, веќе нема од каде да земеме

Вработените во Македонска пошта и денеска протестираа од 8 до 10 часот. Добиле уверувaње дека плата ќе добијат во текот на денов, но не се откажуваат од намерата за штрајк, барајќи од Владата итни реформи во компанијата.

„Финансиската состојба на Македонска пошта е сериозно загрозена. Не обезбедуваме доволно средства за плата. Неколку години обезбедуваме средства преку кредити и позајмици. Дојде момент да веќе нема од каде да обезбедиме средства. Затоа бараме Владата како сопственик да се заложи за реформи и обезбедување финансиски средства за тековно работење“, рече претседателот на синдикатот Боро Велигденов на прес конференција.

Сител постави прашање до Владата дали ќе излезе во пресрет на ова акционерско друштво и оттаму очекуваме одговор.

Вчера и од кабинетот на генералниот директор посочија дека Пошта не е во добра финансиска состојба и заедно со Владата ќе бараат одржливо решение, кое ќе биде во корист на вработените.

Во Пошта има 1.800 вработени и 200 поштари со договор на дело кои со години работат без здравствено осигување и со минимална плата.