Напад врз приватна телевизија во Кабул

Двајца вооружени мажи денеска ја нападнаа приватната авганистанска телевизија „Шамшад“ во Кабул. 

Припадници на авганистанските безбедносни сили соопштија дека пред нападот се слушнала експлозија. 

Според истите извори, еден од напаѓачите бил убиен од страна на обезбедувањето на телевизијата, додека другиот започнал претстрелка со чуварите, кон кои фрлил и рачна бомба. 

Телевизијата што емитува програма на паштунски јазик, поради нападот времено престанала со работа. 

Во соопштението на безбедносните сили не е наведено дали има жртви при нападот, ниту кои се напаѓачите. 

Набрзо по нападот се огласија талибанските бунтовници, кои негираа нивна поврзаност со инцидентот.