Над 27 проценти повеќе посетители во кината во 2015

Во 2015 година за 0,4 проценти бил зголемен бројот на филмски проекции во кината низ Македонија споредено со 2014 година, објави денеска Државниот завод за статистика.

Бројот на посетители на кината, пак, минатата година во однос на предминатата бил поголем за 27,7 проценти. 

Според податоците на ДЗС, во Македонија има 14 кина со вкупно 7.067 седишта и 125 вработени. Од нив, четири се во Скопје  - две во Центар и две во Карпош. 

Како што соопшти ДЗС, во 2015 биле прикажани 973 филмови: 87 домашни, 829 странски и 57 копродукции, а кинопретстави имало вкупно 14.849. 

Посетители во сите 14 кина имало вкупно 529.616, од кои 502.988 посетиле странски филмови. Најголем број посетители (362.039) имало во кината во општина Карпош, а 101.103 во кината во Центар.

По скопските кина, со најголем број посетители следува киното во Битола (55.391), а најмал број посетители минатата година имале кината во Гевгелија (128) и Штип  (171).