МНТ го заврши гостувањето во Словачка, Белорусија и Србија

Македонскиот народен театар (МНТ) со изведбата на претставата „Разговори во четири очи“ во режија на Нина Николиќ во театарот „Kosztolányi Dezső“ во Суботица, Србија ги заврши гостувањата на фестивалите „Central European Theatre Festival“ во Кошице, Словачка и „Belaya Vezha“ во Белорусија, како и гостувањето во  Србија.

Како што информираат од МНТ, претставата, која е во копродукција на МНТ и Скопје Филм Студио, наиде на одличен прием и задоволство од страна на публиката. 

- Публиката ја проследи претставата со големо внимание, и реагираше со воодушевување. Одличната актерска игра, составена од веќе докажани, но и млади актери уште еднаш ги оправда очекувањата кај публиката и организаторите и беше испратена со долги стоечки овации во сите три држави, соопшти МНТ.

На 10 септември „Разговори во четири очи“ се одигра на фестивалот во Кошице, значаен културен настан на кој учествуваа театарски куќи од Полска, Чешка, Унгарија, Македонија и други.

Во селективната програма на Меѓународниот театарски фестивал „Belaya Vezha“ каде на 12 септември со почеток во 18 часот се одигра претставата на Македонскиот народен театар, учествуваа и 14 земји: Белорусија, Грузија, Унгарија, Казахстан, Латвија, Литванија, Македонија, Молдавија, Полска, Русија, Украина, Финска, Чешка и Естонија. Во селективната фестивалска програма настапија 28 театарски куќи, а театрите од целиот свет на белоруската публика и ги прикажаа своите најдобри дела и ги споделија креативните искуства и трендови на модерниот театар.

По Меѓународниот театарски фестивал „Belaya Vezha“ во Белорусија, екипата на „Разговори во четири очи“ во состав: Амернис Нокшиќи-Јовановска, Нина Деан, Петре Арсовски, Дарја Ризова, Катина Иванова, Благој Веселинов и Дамјан Цветановски отпатува за Србија, каде што на 15 септември ја одигра во театарот„Kosztolányi Dezső“ во Суботица.