Меѓународна Конференција за зајакнување на парламентарниот надзор во промоција и заштита на човековите права

Во Собранието денеска ќе се одржи меѓународна Конференција „Поврзување на политиката и праксата: Зајакнување на парламентарниот надзор во промоција и заштита на човековите права“. 

Како што се посочува во најавата за настанот, оваа меѓународна конференција е замислена на едно место да ги собере националните парламентарци, граѓанските организации, владините претставници и меѓународните експерти. Таа има цел да го премости јазот помеѓу политиката и практиката преку создавање наменски форум за дијалог. Тоа ќе обезбеди можност да се споделат најдобрите практики, да се дискутираат предизвиците и да се развијат препораки коишто ќе овозможат законодавната гранка да игра попроактивна улога во надзорот на човековите права - суштинска состојка и за успешен пристап во ЕУ и за цврсто демократско владеење.

Воведни обраќања на конференцијата ќе имаат Симонида Кацарска, директорка на Институтот за европска политика - Скопје, претседателот на Собранието Африм Гаши, народниот правобранител Насер Зибери, генералната секретарка на Собранието Марина Димовска, заменик шефот во Делегацијата на Европската Унија Бен Нупнау. 

Планирани се два панела и тоа за „Зајакнување на парламентарниот надзор над човековите права и интегрирање на меѓународните механизми“ и за „Развивање препораки за акција: Зајакнување на улогата на парламентот во заштитата на човековите права и поттикнување на партнерства за соработка“. 

На панелите ќе се обратат пратеници, претставници на министерствата, како и на граѓанскиот сектор од земјава и од странство.