Македонија
19. March 2016 - 14:21

Манифестација Дојран – град на културата за 2016

Со концерт на Каролина Гочева, Даниел Кајмаковски и ДНК вечер на плоштадот „Под јаворите“ во Нов Дојран, ќе биде отворена манифестацијата „Дојран – град на културата за 2016 година“. За најмладите ќе настапат учесниците на детскиот фестивал „Калинка“ и студиото за модерен балет од Богданци. Се подготвува и огномет.

- Годинава Дојран во рамки на манифестацијата „Град на културата“ ќе понуди широк спектар на квалитетни и разновидни културни содржини од сите дејности, проекти кои ќе ги промовираат врвните културни вредности кај младата популација, но и сите останати генерации, активности кои ќе го афирмираат домашното творештво, домашните автори, репродуктивните уметници и ансамблите, истакна министерката за култура Елизабета Канческа-Милевска, на промоцијата на програмата во Скопје.

Оваа манифестација се одржува веќе 13 години со поддршка на Министерството за култура, низ градовите во државата.

Годинава ќе се овозможи целосна обнова и конзервација на црквата „Св. Пророк Илија“ од 19 век, која е своевиден симбол на градот Дојран. Оваа година, кога се одбележуваат 100 години од уништувањето на црквата во Првата светска војна, за целосната обнова на црквата „Св. Илија “ во Дојран, Министерството за култура издвои околу 4 милиони денари.

Во рамки на манифестацијата предвидени се повеќе од 100 програмски содржини. Во април ќе се одбележи Денот на шегата со маскенбал, во мај ќе има изложбен викенд на уметнички слики и скулптури во рамки на „Дојранската ликовна колонија“, а во јуни ќе се одржи „Дојран-гурман фест“.

Концерти ќе имаат популарните изведувачи и реномирани состави како Љубојна, Летечки пекинезери, Сашо Гигов-Гиш, Слаткаристика, Тамара Тодевска, Дарко Илиевски, Даниел Камајкоски, ДНК, Ефто Пупиновски, Сузана Спасовска, Александар Тарабунов... Ќе се одржи „Д фестивалот“, ќе има изложби на македонските ликовни автори, како Сотир Хаџи-Николов, Александар Јанев, претстави на Театарот за деца и младинци и Театарот Комедија. Ќе се реализира фолклорен викенд на фолклорните друштва од целиот југоисточен регион и Фестивал на боите.