„Комунална хигиена“ воведе ГПС-систем за мониторинг на собирањето и транспортот на отпадот

Јавното претпријатие „Комунална хигиена“-Скопје воведе најсовремен ГПС-систем со кој ќе врши надзор на движењето на сите специјални комунални возила за собирање и транспорт на отпадот, како и на моменталната состојба на исполнетост на капацитетот на садовите за отпад, соопшти претпријатието.

Траекторијата на возилата, нивната моментална локација, брзината на движењето и потрошувачката на гориво се само дел од податоците што раководството на Претпријатието во секој момент ќе ги има на увид, преку употребата на ГПС-системот за надзор. Преку поставените сензори на контејнерите ќе се утврдува колкава е моменталната исполнетост на нивниот капацитет и дали има потреба од нивно празнење.

Од претпријатието очекуваат големи придобивки од воведувањето на овој систем, најмногу преку увидот во движењето и локацијата на возилата, како и потрошувачката на горивото.

– Особено е значајна можноста сензорски да се утврди дали еден контејнер е целосно или делумно исполнет со отпад и во согласност со тоа да се испланираат активностите на екипите на претпријатието, изјави директорот на „Комунална хигиена“, Абдусамед Шабани.