Колку резервации и туристички аранжмани се откажани заради новите услови за излез од земјава?

Новите правила за минување граници одново негативно влијааат врз работата на туристичките агенции. Иако е рано за конкретни пресметки, туристичките работници велат дека веќе се откажани околу 15% од резервациите и тоа по само една недела откако услов за влез или излез од земјава е вакцинален картон, доказ за прележан Ковид-19 пред најмногу 45 дена или негативен ПЦР тест.

Туристичките агенции предлагаат различни решенија за да се олесни патувањето и туристите да немаат големи дополнителни трошоци, а со цел од една страна да се заштити здравјето, а од друга нови мерки да не се одразат негативно врз туризмот.

Агенциите се плашат дека условеното патување ќе значи нов удар врз нивната работа и слаба зимска сезона.

Во меѓувреме зајакнуваат рестрикциите за влез во многу земји од регионот и Европа. Од денеска веќе и во Албанија, каде слободно се патување, сега може да се влезе само со сертификат за примени две дози вакцина пред најмалку две недели, доказ за прележан Ковид-19, негативен ПЦР тест не постар од 72 часа или антиген тест не постар од 48 часа. Во Бугарија, пак, воопшто не е дозволен влез за туристички цели.