Јановиќ: Брутално сме „украдени“!

Репрезентацијата на Црна Гора загуби во финалето на ЕП во ватерполо од домаќинот Србија со 10-8 но ватерполистите на оваа мала приморска земја не се согласуваат дека загубиле од подобар противник.

Најгласен во реакциите е репрезентативецот Никола Јановиќ кој обвини дека судиите и службените лица на финалниот меч подлегнале на атмосферата и со голем број сомнителни одлуки му помогнале на домашниот тим да дојде до третата титула во серија.

„Жал ми е, чувствувам горчина....Би сакал да им кажам многу убави работи на колегите од српската репрезентација, тоа се прекрасни момчиња, одлични ватерполисти и се што освоија до сега го заслужија....но не и вечерва. На брутален начин сме украдени и жал ми е поради тоа“ - изјави Јановиќ кој најави реванш на ОИ во Рио каде Црна Гора избори директен пласман.