Хуманитарна акција на кумановскиот Црвен крст

Волонтерите на кумановската организација на Црвениот Крст изработуваат новогодишни украси кои од денеска ќе почнат да ги продаваат на граѓаните на фреквентни места во Куманово на плоштадот, зелените пазари, трговските објекти, супермаркетите. Рачно изработените украси ќе се продаваат по симболична цена, а собраните средства од претпразничната хуманитарна активност ќе бидат доделени на социјално ранливи категории граѓани.

- Ова е традиционална активност која има за цел да ја поттикне хуманоста и солидарноста, изјави Ива Младеновска, стручен соработник во кумановскиот Црвен Крст.

Од клубот на млади од кумановскиот Црвен крст информираа дека во активноста вклучени се и основци и средношколци од градот. Изработката и продажбата на новогодишни украси и честитки, Црвениот Крст ја спроведува секоја година, а собраните средства се доделуваат на различни социјално ранливи категории граѓани, самохрани родители, лица со попреченост, стари и изнемошени, приматели на социјална парична помош.