Груевски го информирал Борисов дека ВМРО-ДПМНЕ нема да го поддржи Договорот

ВМРО-ДПМНЕ согласно ставот на Централниот комитет на партијата, нема да даде поддршка на договорот кој го потпиша владата на Зоран Заев, а за кој ВМРО-ДПМНЕ имаше конструктивни и суштински забелешки и предлози за негово подобрување.

Како што соопшти ВМРО-ДПМНЕ, ова го изјавил претседателот на ВМРО-ДПМНЕ, Никола Груевски, на денешната средба со премиерот на Република Бугарија, Бојко Борисов.

- Во однос на Договорот за добрососедство, пријателство и соработка, претседателот Груевски истакна дека ВМРО-ДПМНЕ во однос на оваа тема има принципиелни, долгогодишни и аргументирани ставови чија основна идеја беше постигнување на договор во кој нема да има чувство на победник и поразен и кој ќе ја реализира идејата за вистинско и рамноправно пријателство и соработка помеѓу двете држави и народи. Тој го извести својот соговорник дека согласно ставот на Централниот комитет на партијата, ВМРО-ДПМНЕ нема да даде поддршка на договорот кој го потпиша марионетската влада на Зоран Заев, а за кој ВМРО-ДПМНЕ имаше конструктивни и суштински забелешки и предлози за негово подобрување, се наведува во соопштението.

Од партијата, посочуваат дека двајцата ја истакнале заедничката посветеност за унапредување на добрососедските односи во сферите од заеднички интерес, и интеграцијата на Република Македонија во Европската Унија и во НАТО. Груевски, се посочува, истакнал дека ВМРО-ДПМНЕ е за продлабочување на пријателството помеѓу Република Македонија и Република Бугарија, економски развој и подобра соработка помеѓу македонскиот и бугарскиот народ.

- Двете страни ја истакнаа значајноста и потребата од што побрза интеграција на Република Македонија во НАТО и во Европската Унија, како приоритет кој ќе обезбеди трајна стабилизација на регионот и ќе обезбеди услови за дополнителен економски развој на истиот, се наведува во соопштението.

Соговорниците, се додава, разговарале и за соработката во рамки на Европската народна партија, каде што членуваат и двете партии ВМРО-ДПМНЕ и ГЕРБ.