Германија: Потрага по изнудувач кој бара пари за да не ја затруе храната

Германската полиција го идентификуваше изнудувачот, кој се закани дека ќе затруе прехранбени производи по продавниците, ако трговските синџири не му платат откуп од 10 милиони евра, соопшти претставник на полицијата.

- Кога ги прегледавме снимките од камерите за надзор, го утврдивме идентитетот на осомничениот, изјави портпаролот на полицијата.

Отров е откриен во пет тегли бебешка храна во продавници во Фридрихсхафен, во провинцијата Баден-Виртемберг. Користен е етиленгликол, кој се користи за антифриз и во течноста за сопирачките, и во одредена концентрација може да предизвика смрт.

Изнудувачот го ставил отровот во храната за бебиња за да докаже дека е сериозен во својата намера и на 16 септември соопшти каде може да биде пронајден. Во електронската порака испратена до повеќе супермаркети, тој се заканил дека ќе затруе дваесетина производи.

Во пораката, изнудвачот изјавил дека цел му се „националните и меѓународните ограноци на германски фирми за прехранбени производи и козметика“.

Изнудувачот го испратил електронското писмо со своите барања за откуп до организација за заштита на потрошувачите и до голем број трговски фирми.