ЕП ќе разговара за проширувањето на Шенген и преговорите со Велика Британија

Европскиот парламент на својата последна седница во 2017 година во Стразбур ќе разговара за  пристапувањето на Бугарија, Романија и Хрватска во Шенген.

Програмата предвидува членовите на Европскиот парламент да расправаат за темата в среда.

Во пресрет на дебатата, европратеникот Сергеј Станишев изрази очекување дека трите земји ќе се приклучат на Шенген до крајот на бугарското претседателство со Советот на ЕУ.

ЕП в среда ќе се произнесе и за постигнатиот договор меѓу Европската комисија и Лондон во преговорите за повлекување на Велика Британија. Се очекува пратениците да го потврдат постигнатиот напредок и да му  препорачаат на Европскиот совет да го одобри започнувањето на трговските преговори со британските власти.

ЕП утре ќе се фокусира главно на теми поврзани со ситуацијата во Африка и Азија. Се планира да се разговара за усогласување со нуклеарниот договор со Иран, потоа, за одлуката на претседателот Доналд Трамп да ја премести американската амбасада од Тел Авив во Ерусалим, како и за настаните во Авганистан и Либија.

ЕП ќе гласа за извештаите за европската надворешна и одбранбена политика, како и за извештајот за борбата против даночните измами.