Џафери се сретна со претседателот на Европскиот комитет на регионите Ламберц
Претседателот на Собранието на Република Северна Македонија, Талат Џафери денеска се сретна првиот човек на Европскиот комитет на регионите, Карл-Хајнц Ламберц, кој е во дводневна посета на земјава.
Европскиот комитет на регионите е советодавно тело на Европската Унија, составено од локално и регионално избрани претставници кои доаѓаат од сите 28 земји – членки и кои даваат мислење за законодавството на ЕУ што директно влијае на регионите и градовите.
Џафери, како што информира собраниската Прес-служба, истакна дека граѓаните очекуваат од единиците на локалната самоуправа да задоволат широк спектар на економски, еколошки и социјални потреби и за таа цел се посветува големо внимание на проширувањето на надлежностите на локалните власти, на зголемената фискална децентрализација и фискалните капацитети и правичното спроведување на Законот за еднаков регионален развој.
Тој посочи дека на политички план во изминатиот период земјата успеа да ја надмине политичката криза, да го зајакне владеењето на правото, да направи фундаментални промени во насока на инклузивна и отворена политичка атмосфера и да испорача конкретни резултати.
– Во однос на зајакнувањето на добрососедските односи, беа преземени тешки и храбри чекори за решавање на проблемот со името, со што се отвори и патот кон евроатланска интеграција на земјата, а со Договорот од Преспа и со Договорот за добрососедство со Бугарија, Република Северна Македонија придонесе за пошироката регионална стабилност и даде пример за помирување во регионот, порача Џафери.
Ламберц, пак, рекол дека неговата посета на земјата во време кога се очекува Европската Унија да определи датум за почеток на преговорите за членство, претставува поддршка на Комитетот на овој наш стремеж, имајќи го предвид позитивниот извештај на ЕУ за напредокот на Република Северна Македонија.
Тој истакнал дека земјава реши важни прашања во законодавството во однос на децентрализацијата, фискалната децентрализација и регионалниот развој, но и дека тоа се клучните предизвици со кои се соочуваат сите европски држави. Нагласувајќи ја важноста на меѓуграничната соработка, претседателот Ламберц информираше за можностите и механизмите кои ги нуди Европскиот комитет на регионите, кои пак не можат да се применат без националното законодавство и изрази надеж дека, во наредниот период ќе има напредок во оваа насока.
На крајот, тој изрази оптимизам дека во октомври ќе има добри вести од ЕУ и дека следниот чекор за земјата ќе биде почетокот на преговорите, поглавје по поглавје.
Ново на Сител
-
Пронајдено тело на починат маж во Вардар во Велес
-
Благодатниот оган и оваа година од Ерусалим ќе пристигне во Грција
-
Зеленски: Русија во април употреби 300 ракети, 300 дронови и 3.200 касетни бомби во нападите врз Украина
-
ДСЗИ најави забрана на Клиниката за токсикологија за здравствени работници без договори за вработување
-
Во рамки на акцијата „Темпули“ полицијата во Тирана уапси 20 лица и заплени кокаин, хероин и канабис
-
Приведени 14 државјани на Србија кои измамиле германски државјани за милион евра
-
Зголемен бројот на работници во индустријата
-
78-годишен тетовчанец тешко повреден во сообраќајка